Scusate ‘na preghiera

Scusate tanto dell’impertinenza,
si nun me sbaglio, site vuie Maria?
‘A figlia d”a bonanema ‘e Vicenza,
l’albergatrice ‘e coppa ‘a ferrovia?
Vurria sape’ na cosa, perdonate,
‘a nnammurata site vuie, ‘e Totonno?
V”o spio, pecchè siccomme songo ‘o pate
Tengo ‘o duvere ‘e di’: “Chisto è nun suonno!”
Aggio saputo ca nu bene ‘e core,
‘a n’anno ve ‘ncatena a tutt”e dduje,
ma io vi prego d”o spezza’ st’ammore
Totonno, ‘o figlio mio, nun è pe’ vuje.
E nun ve l’aggia dicere ‘o pecchè,
è cosa ca riguarda sulo a me.
Vuje site onesta, pura cchiù ‘e na rosa
e si ‘o mettesso in dubbio sarria vile,
ma chistu matrimmonio nun è cosa,
Totonno ha da turna’ cu mme a ‘o Brasile.
E po’ nun ve vo bene, ve repassa,
m’è figlio, ‘o saccio, nun tene parola
è pazzo, ve ‘ncatena e po’ ve lassa,
e vuje site na povera figliola.
Sentite a me, spezzate chist’ammore,
io si parlo accussi’, nun aggio tuorto,
nun me dicite ca nun tengo core,
facite cunto ca Totonno è muorto.
e nun m’addimannate cchiù ‘o pecchè,
è cosa ca riguarda sulo a me.
E’ na buscia ca io songo capetuosto,
io saccio chello ca vuje nun sapite,
sentite a me chesto è po’ bene vuosto,
è inutile, perciò, ca vuje chiagnite.
Poco te ‘mporta d”o cunsenso mio?
Dimane cu Totonno te ne fuje?
Ah no, si ‘o fate, quanno è certo Dio,
cu ‘e mmane meje v’accido a tutt”e dduje.
Tu vuo’ ca io parlo, embè, guardame ‘nfaccia,
vint’anne fa, nun te fa meraviglia,
mammella toia cadette int”a ‘sti bracce
e tu, Maria mia, tu me si figlia.
Si m’ostinavo, mo saje ‘o pecchè.
‘o nnammurato tuio, è frato a te.