Pusilleco addiruse

‘Ncopp”o Capo ‘e Pusilleco addiruso,
                 addó’ stu core se n’è ghiuto ‘e casa,
                 ce sta nu pergulato d’uva rosa…
                 e nu barcone cu ‘e mellune appise.
                 …’Ncopp”o Capo ‘e Pusìlleco addiruso.
 
                  E nu canario, canta na canzone
                 ‘a dint’a na cajola, appesa fore…
                 E ll’èllera, s’attacca a stu barcone,
                 comme nce s’è attaccato chistu core…
 
                                                                II
 
                 Quanno ‘o sole p”o monte se n’è sciso,
                 chest’aria fresca se fa cchiù addirosa,
                 e torna da ‘a fatica Angelarosa,
                 cu ‘o fascio ‘e ll’erba aret’ê spalle appiso…
                 …Quanno ‘o sole p”o monte se n’è sciso!
 
                 Stámmoce attiente a ‘o segno cunvenuto:
                 – Barcone apierto: Ce sta ancora ‘o frato
                 – Perziana scesa: ‘O frato se n’è asciuto…
                 e ‘appuntamento è sotto ‘o pergulato!…