Pupazzetti
Io mm’arricordo ca te canuscette
ch’ire proprio piccerella,
na criatura comm’a me…
Jévamo â scola ‘nzieme e te dicette:
“Stammo ‘e casa â stessa strada,
mme retiro ‘nziem’a te?”
Nun mme diciste: “Sí”,
ma nun diciste: “No…”
E io t’accumpagnaje…
Tu, senza genitore comm’a me,
io, senza mamma e pate comm’a te…
Riturnávamo da ‘a scola,
sott”o vraccio, sule sule…
(Comm’a chilli pupazzette d”e giurnale…)
Ma felice comm’a che!
Ma felice comm’a che!
II
Na zia tenive ca te maltrattava,
na zia ‘nfame e senza core…
Tu chiagnive comm’a che…
Nu zio tenevo io pure e mme trattava
comm’a chi tratta a nu cane…
E io chiagnevo comm’a te.
Ma tutto va a ferní…
‘O tiempo vola e va…
Passajeno ‘e mise e ll’anne…
Po’, quanno diciott’anne tenev’i’
tu ne tenive quinnece, Marí’…
E na sera ‘e Primmavera
‘mmiez’ê rrose e ‘mmiez’ê sciure,
nun parlaje ‘sta vocca mia, parlaje stu core…
Tu cadiste ‘mbraccio a me!
Io cadette ‘mbraccio a te!
III
Ma ‘ncopp”a terra tutt’è destinato:
tu truvaste ‘e genitore…
te venettero a pigliá!
E io rummanette triste e abbandunato…
mme guardavo nu vapore
ca vedevo ‘e alluntaná…
E mme lassaste tu…
nun t’aggio vista cchiù…
T’accumpagnaje stu core.
Mo tiene ‘e genitore, vijata a te!
Si’ ricca assaje e t’hê scurdata ‘e me
Ma ‘o ricordo ‘e chella scola,
mo è rimasto sulo sulo…
Uno ‘e chilli pupazzette d”e giurnale,
torna â casa senza ‘e te…
Comme campo senza ‘e te?!
