Prezzetella ‘a capera

Nun dicenno ammancamento songo aunesta:
nun ce stanno fose ‘appennere a sta vesta.
Me mantengo ‘ncopp’ ‘a mia:
nnammurate? arrassusia:
che bribbanta malatia.
Statte sodo! e pe’ sape’?
Leva ‘e mmane ‘a cuollo a mme!
L’ommo vene, pogne e fuje;
quanno è doppo: male a nuje.
Vaie ‘nzuttana e cammicetta,
pecché ‘a vesta te va stretta;
cchiù cammine e cchiù te scasce
cu chell’anema ‘e rancascia;
po’, fra tanta chiappe ‘e ‘mpise,
va truva’ chi te l’ha… Guè!
Va’! Va’ scola; e pe’ sape’?
Leva ‘e mmane ‘a pietto a mme!
D’ ‘e ccapere d’ ‘o Mercato songo ‘a masta:
e nisciuno dint’ ‘o stritto me ‘ncatasta.
Va’! nun tiene cchiù salute:
tu hê ‘ave’ ‘ncopp’ ‘e ssagliute
n’ato ‘areto ca t’aiuta!
Vi’ si cionca! e pe’ sape’?
Leva ‘e mmane ‘a cuollo a mme!
Parla ‘a mo fino a dimane:
ma nn’hê ‘a maie pazzia’ cu ‘e mmane;
ca si no te faie cchiù sicco:
faie sta faccia comm’ ‘o micco;
po’ addeviente pelle e ossa:
vaie cu ‘o pede dint’ ‘a fossa;
quanno po’ te si’ distrutto,
te nne muore e nun me… Guè!
Jette ‘acito! e pe’ sape’?
Leva ‘e mmane ‘areto a mme!
Che vuo’ fa’? me vuo’ purta’ ‘ncopp’ ‘a ‘Nfrascata?
Ma pecché ce ‘a vuo’ sciupa’ sta scampagnata?
Tanto io vino nun ne vevo:
e, si pure ce venevo,
chello ‘ncapa nun me jeva.
Oh, ma inzomma, e pe’ sape’?
Leva ‘a mano ‘a sott’a me!
Nun me cuoglie sott’ ‘a scella:
songo sempe Prezzetella!
Si mme spuse, a nomme ‘e Ddio,
st’uosso ccà t’ ‘o spuzzulìe:
anze è meglio ca tu ‘a miette
na sepponta sott’ ‘o lietto;
ma, si cride ‘e fa’ pe’ spasso,
bellu mio, tu nun m’ ‘a… Guè!
Ah? me spuse? ‘Un parlo cchiù!
Miette ‘e mmane addo’ vuo’ tu!