Penzammo ‘a salute

Tu mm’hê lassato…
          tu mm’hê traduto…
          che mme ne ‘mporta nèh?!
          che mme ne ‘mporta nèh?!
          Mme stó’ facenno ‘e cunte â fin”o mese,
          sparagno ‘a copp’a mille lire ‘e spese
          ca sciupavo pe’ te!
 
          Mo mme ne vaco sulo p”a marina,
          mo mme ne vaco a pede a Margellina…
          E ‘e solde ca spennévo,
          quanno jévamo ‘ncarruzzella…
          Mo…
          mme n’accatto pizze cávere
                                e muzzarella!
                               II
          Mo stóngo allero,
          faccio ‘o signore…
          pe’ dint”e varietá,
          sciantose ‘a ccá e ‘a llá…
          P’avé n’abbraccio ‘a te, nun pare overo,
          avev”a fá n’esposto ô Ministero…
          mme facive sperí…
 
          E quanno na resélla mme facive,
          sempe quacche regalo ‘a me vulive…
          E ‘e solde ca spennévo
          pe’ n’abbraccio e nu surriso…
          Mo…
          mme n’accatto vino ‘e Pròceda
                                e palle ‘e riso!
                               III
          Io nun durmevo,
          io nun mangiavo:
          Penzavo sempe a te…
          penzavo sempe a te…
          Si mme facevo nu vestito astrinto,
          doppo tre ghiuorne ce abballavo ‘a dinto…
          Mm’ero fatto accussí…
 
          Mo invece tutt”a rrobba mme va stretta,
          se scósono ‘e buttune d”a giacchetta…
          e ‘e solde ca spennévo
          p”e sserénghe ‘e Zambellette,
          Mo…
          mme n’accatto carne ‘e piécuro
                                e cutalette!