Passa ‘a bandiera

Passa ‘a fanfarra e sona ‘a marcia riale,
                 passano ‘e bersagliere e ‘o Triculore…
                 Vedenno ‘e tre culure nazionale
                 ognuno sente ‘a Patria dint”o core…
                 Tutt”e guagliune corrono,
                 sbattono forte ‘e mmane…
                 e saje chi só’?
                 Só’ ‘e surdate ‘e dimane!
 
                 Passa ‘a bandiera,
                 svèntola e va,
                 cuntenta e allèra
                 ‘o viento ‘a fa…
                 E saje pecché
                 s’ha misa ‘a nocca blummaré?
                 Passa ‘a bandiera
                 e passa ‘a Patria
                 e ‘o rre!
 
                                                             II
 
                 Guarda: só’ tre culure e só’ stracciate,
                 gente e cadé e murí hanno viste assaje…
                 ma chille che ‘a bandiera ha cummigliato,
                 só’ muorte ca nun murarranno maje…
                 Tant’uommene salutano
                 cu ‘a mano ‘e bersagliere…
                 e saje chi só’?
                 Só’ ‘e suldate d’ajére…
 
                 Passa ‘a bandiera,
                 ……………………….
 
                                                           III
 
                 N’ommo resta cu ‘a capa cummigliata…
                 corre nu giuvinotto risuluto:
                 “E tu ‘a bandiera nun ll’hê salutata?
                 ch’è, nun ‘a cride degna ‘e nu saluto?”
                 Ma chillo scappa a chiagnere,
                 po’ dice a ‘sta minaccia:
                 “‘O bbi’ chi só’?
                 ll’aggio dato ‘e ddoje braccia!”

 
 
 
                 Passa ‘a bandiera,
                 sventola e va…
                 cuntenta e allera
                 ‘o viento ‘a fa…
                 E pure a me
                 mme sbatte ‘o core e saje pecché?
                 Passa ‘a bandiera
                 e passa ‘a Patria
                 e ‘o rre….