Papele ‘o marenaro
Ve voglio fa assapé ch”a voglio bene,
ca ce simmo spusate pe’ passione…
e mme levasse ‘o sango ‘a dint”e vvéne
pe’ nun lle fá mancá nu muorzo ‘e pane…
Vuje, cu ‘e rricchezze voste,
cercate ‘e v”a pigliá…
Ma avete fatto i conti senza l’oste…
e ll’oste…signurino mio, sta ccá!
II
Stammatina, ê ssette e meza,
stevo giá a Santa Lucia,
arrischianno ‘a vita mia
‘mmiez’ô mare a faticá…
Stammatina, â casa mia,
addó’ ce sta scritto: “Onore”
è sagliuto nu signore
cu nu fascio ‘e rose thè…
A chi ‘e vvuleva dá…ll’immaginate!
però…se ll’ha purtate n’ata vota…
Io, ca nun sóngo ricco e só’ alfabeto,
si ‘o trovo ll’aggi”a dí: “Vuje nun servite!
Mógliema Carmenella
nun diciarrá maje: Sí…
E’ onesta…E si tenite na sorella,
‘o stesso fascio ‘e rose ce ‘o port’i’!…”
III
Ma ched è, v’amariggiate?
stu trascurzo nun ve piace?
Vuje v’avit”a fá capace
ca ‘sta storia ha da ferní…
Si ve ‘ncòccio n’ata vota
ca passate pe’ ‘sta via,
giuro: “Privo ‘e mamma mia,
nun ve faccio passá cchiù!…”
Ca state armato, nun mme fa paura:
tengo nu vraccio ‘e fierro e ‘o core ‘acciaro!…
Io, quanno veco ‘a morte, ‘a guardo e riro…
e levo ‘a vita a chi mme leva ‘ammore…
Ll’onore mio mm’è caro:
nun mm”o levá…Pecché,
si mm’arricordo ca só’ marenaro,
te porto ‘nfunn’ô mare…’nziem’a me!
