‘O vascio
‘A gente ca mme vede ‘e sentinella,
‘nnanze a stu vascio da ‘a matina â sera:
“Ma chisto – dice – ha perzo ‘e ccerevelle?
Ma comme? s’è cecato ‘e ‘sta manera?”
E invece, i’ voglio bene a na figliola,
ca sta ‘int”o vascio…e nun è vasciajola!
No, stu vascio nun è vascio…
E’ na reggia…E’ ‘a meglia reggia…
E sissignore, ‘o pate è masterascio…
E sissignore, ‘a mamma è ‘mpagliasegge…
Ma hanno fatto chella figlia
ch’è na vera meraviglia,
ca pe’ sbaglio è nata llá!
II
‘A mamma dice: “No, signore mio!
A stá ô sicondo piano?…Nun sia maje!”
E ‘o pate dice: “Quant’è certo Dio,
io ‘nchian”e terra ce stó’ buono assaje”
E intanto, a figlia, chella bella zita,
vò’ stá cu lloro quanno se mmarita…
No, stu vascio nun è vascio…
………………………………………..
III
E ajeressera mme só’ appiccecato
cu ‘e genitore mieje ch’hanno ragione…
Papá, ch’è pronipote ‘e titolato,
dice: “E addó’ va a ferní chistu blasone?”
Ma i’ penzo ca pe’ duje uocchie ‘e brillante,
scenne ‘a cavallo pure nu rignante!”
No, stu vascio nun è vascio…
………………………………………..
