‘O scarpariello

Jeva pe’ ‘nnummenata ‘int’ ô quartiere,
Faceva cierte scarpe su misura
C’accuntentava ‘e meglie d’ ‘e signure,
‘Stu scarpariello ‘e dint’a Sanità.

‘Nu juorno ‘na figliola, ‘a Reginella,
S’appresentaje a ‘nnanz’ ô bancariello:
“M’hê ‘a fà ‘nu bello pare ‘e scarpetelle,
Raso e merletto, quanno aggi’ ‘a spusà”.

‘Nchiova, ‘nchiova, scarpariello,
Pe’ ‘sti scarpe ‘e Reginella.
Ma ‘stu chiuove ‘int’ ê cervelle
Comme pogne, scarpariè.
‘Stu pensiero, levatillo!
‘Nchiova, ‘nchiova, scarpariè!

Chillo nun ll’aveva fatta maje ‘a ‘mmasciata
Pe’ nun avè ll’affronto ‘e ‘nu rifiuto.
Ma Reginella nun ll’eva capito,
Diceva: “Ma quant’arie ca se dà!”

Ma ‘o scarpariello mò s’era deciso,
Teneva pronto ‘nu biglietto rosa.
Quanno ‘nce ‘o steva danno cu ‘na scusa,
Chella lle ddà ‘e scarpe pe’ spusà.

‘Nchiova, ‘nchiova, scarpariello,
Ll’hê perduta a Reginella!
‘Stu biglietto, astipatillo,
Leva mano, sient’ a mme!
Nun dà retta, scordatella!
‘Nchiova, ‘nchiova, scarpariè!

Venimmo a nuje. Trasevano dint’ â chiesa.
‘Nterra a ll’altare ‘nu biglietto rosa,
‘O sposo ‘o legge, cade ‘nterra ‘a sposa.
S’arrevutaje ‘o quartiere ‘a Sanità.

‘O sposo, ch’era ‘n’ommo assaje deciso,
Dicette: “Nun mm’ ‘a tengo chest’offesa!
Pe’ chist’affronto nun ce stanno scuse!
Nisciuno tene ‘a forza ‘e me fermà!”

‘Nchiova, ‘nchiova, scarpariello,
Ma ‘stu sposo ‘e Reginella
Va sapenno: è proprio chillo
Ch’era tanto amico a tte.
E comm’è! Caccia ‘o curtiello!
Statte attiento, scarpariè!

Comme sbatte ‘stu martiello
‘Ncopp’ ê fierre ‘e ‘sta cancella
Ca te leva ‘o sole a tte.
Comme chiagne Reginella:
“Ma ch’hê fatto, scarpariè!”