Nun e’ Carmela mia

Si mme vulite bene,
          nun mme parlate ‘e chella…
          Tutta truccata e bella…
          nun ‘a cunosco cchiù!
 
          Nun è Carmela mia
          chella ca mo è turnata…
          no, nun è chella !…è n’ata!…
          nn”a voglio cchiù vedé!
 
          Poveru core mio,
          chella è turnata pe’ te fá danná…
          Dille pe’ sempe addio…
          s’è avvicinata pe’ s’alluntaná…
 
          Mo s’ha cagnato ‘o nomme…
          nun tene ‘a stessa voce…
                 mo tene ‘a vocca doce,
                        te mette ‘ncroce,
                                te fa murí!
 
                             II
          Carmela nun teneva
          oro…perle e brillante,
          cappielle ‘e lusso, guante,
          ll’uocchie pittate blu…
 
          Carmela era na santa…
          tanto na bona figlia!
          Partette pe’ Marsiglia
          pe’ nun turná maje cchiù!
 
          Poveru core mio,
          ………………………
 
                            III
          Oje má’, tu ca mm’aspiette
          prijanno tutt”e ssere…
          ‘nnanz’â Madonna, ‘e ccére,
          nun ll’appicciá pe’ me…
 
          Prega pe’ te surtanto:
          Stu core senza vita,
          campa cu na ferita,
          ca nun se pò saná!…
 
          Poveru core mio,
          ………………………