Maistà
‘O cardillo dint”a cajola
sta chiagnenno ca resta sulo
e Carmela ca resta sola
se sta zitta, ma fa pietá…
I’ nun chiagno, pecché mme pare
comme fosse nu dissonore,
pecché penzo ca ‘o militare,
cierti ccose nun ‘e ppò fá!…
Ma a Carmela, mia dorge sposa,
gli ho prommiso na bella cosa:
“Ce appresentamm’a ‘o rre
pe’ dicere: Maistá,
Carmela, senza ‘e me,
nun vò’ campá…
nun pò campá!…
Quann”o vvulite vuje,
tutto se pò aggiustá:
Na branda, a tutt’e duje,
nce ‘a pònno dá,
nce ‘a pònno dá…”
II
E mammélla mme fa na pena
quanno prega a Giesù Bammino:
“Mo ch’è ‘o tiempo de la nuvena
a stu figlio mme ll’hê ‘a lassá…
E’ nu buonu ciaramellaro,
ma nun serve comme a guerriero;
tu mme lieve n’oggetto caro
ca nun tiene che te ne fá!”
Ma a mammélla ca nun reposa,
gli ho prommiso na bella cosa:
“Nce appresentamm’a ‘o rre,
pe’ dicere: Maistá,
mammélla, senza ‘e me,
nun vò’ campá,
nun pò campá:
Quanno ‘o vvulite vuje,
tutto se pò aggiustá:
Na branda a tutt’e duje
nce ‘a pònno dá,
nce ‘a pònno dá!”
III
Addio pianta ‘e carufanielle,
addio vòccole e pullicine
che ‘a matina, tutt”e mmatine,
v”a facíveve attuorno a me!
Addio poveri ppecurelle
ca restate senz”o pastore…
I’ ve lasso nu piezz”e core,
ma nisciuno ll’ha da sapé…
Ma a ‘o cardillo ca nun reposa,
gli ho prommiso na bella cosa:
“Nce appresentamm’a ‘o rre
pe’ dicere: Maistá,
st’auciello senz”e me
nun vò’ campá
nun pò campá:
Quann”o vvulite vuje,
tutto se pò aggiustá…
Na branda, a quatt”e nuje,
nce ‘a pònno dá,
nce ‘a pònno dá!
