L’ultima tarantella
Tarantella,
s’è mis”e rimpetto
pe’ farme dispietto…
e dispietto mme fa!…
I’ te veco:
Tu ‘o guarde sott’uocchie
ma dint”e ddenócchie
te siente ‘e tremmá…
Tu ‘o vuó’ bene, mannaggia ‘o vuó’ bene!
Si’ spergiura si dice ca no…
Prigiuniera stu ‘nfame te tène,
prigiuniera e fa chello ca vò’!
Guarda a me!
guarda a me!
comm’a quanno,
mo fa ll’anno,
te purtaje
dint”a cchiesa d”a Madonna d”a Catena…
Comm’a quanno
te vasaje
chesta vocca ardente e bella
ca, stasera, si mme vasa, mm’avvelena…
Tarantella!
II
Tarantella!
Stu core è d”o mio
pecché surtant’io
tengo ‘o deritto d”o ddí!
Jammo, abballa!
Strignímmoce forte
p”a vita e p”a morte
attaccáte accussí…
I’ nun tengo a nisciuno e tu ‘o ssaje
che calvario aggio fatto pe’ te…
Te disprezzo pe’ quanto t’amaje
e nisciuno t’ha amata cchiù ‘e me!
Guarda a me!
………………….
III
Tarantella!
Tu vi’ st’abetiello?
Na sferra ‘e curtiello,
annascosta, ce sta!
‘Nnanz’a st’uocchie
mme passa nu velo…
‘sta mano è nu gelo
e paura mme fa…
I’ só’ zingaro e saccio ogne cosa:
tutt’e duje site pronte a partí…
Pe’ signale ha sfrunnato na rosa,
ma nun sape che spina songh’i’…
Bada a te!
Bada a te!
Nun mm’arrènno,
nun mm’arrènno,
só’ dannato!
Nun só’ carne battezzata: só’ na jena!
Ma i’ t”o stenno
‘nzanguinato
chist’amico ca mo abballa…
‘nnanz’â cchiesa d”a Madonna d”a Catena!
Tarantella!
