Lo zoccolaro

Zoccolaro!
         Ah! Chi vò’ lo zoccolaro?
         Lo scarpino chi lo vò’?
         No carrí’ vanno a lo paro
         ma a cchiù poco nce li dó’
         a chi bella vò’ paré…
         Zoccolaro, zoccolé’…

         Zoccolaro!
         Nce ne stanno piccerelle
         fatte acconce…mo nce vò’!
         A li piede aggraziatielle
         sulamente nce li dó’…
         Ca cchiù belle hann”a paré…
         Zoccolaro, zoccolé’…

         Zoccolaro!
         Quanta core ‘nnammorate
         li vorranno ‘mmidiá…
         ca duje zuoccole apparate
         volarríano addeventá!
         Se la pigliano con me…
         Zoccolaro, zoccolé’…

         Zoccolaro!
         Ogne chiuovo ch’aggio miso,
         mme só’ puosto a sospirá:
         Comm’è doce chillo piso
         ca ‘sto ligno portarrá…
         Fortunato è cchiù de me…
         Zoccolaro, zoccolé’…

         Zoccolaro!
         Si quaccuno fa ll’ammore,
         s’accattasse chisti ccá
         ca non fanno maje rommore
         e non scétano a mammá!
         Gué pericolo non c’è…
         Zoccolaro, zoccolé’…