‘E pentite
Io stó’ dint”e “Ppentite”. E tu addó’ staje?
E cu chi staje? Chesto vurría sapé…
Tu duorme ‘a notte? Ma io nun dormo maje
e ‘nnant’a st’uocchie veco sulo a te…
Che vuó’, che vuó’? Nemmeno si’ cuntento?
mo ca pe’ te mm’hanno ‘nzerrata ccá?
Si mamma aspetta ‘o juorno ca mme pento,
falle assapé ca só’ pentita giá…
Pentita ‘e che? Pentita
ca t’aggio amato assaje!
‘Nfame, nisciuna, maje,
fuje cchiù pentita ‘e me…
II
Jurnate sane aret”a gelusia
desideranno ‘o sole e ‘a libertá…
Passa ‘o pianino e saglie, ‘a miez”a via,
quacche canzone ‘e tantu tiempo fa…
E i’ canto. Che te cride? I’ chiagno e canto
e po’ jastemmo e po’…torno a cantá…
Ah, comm’è allèra, ‘int’a stu campusanto,
‘sta sciantusèlla d”o cafè Sciantá!
Pentita ‘e che? Pentita
………………………………
III
Mme só’ sunnato a n’angiulillo junno,
nennillu mio…ca mme diceva: “Oje má’…
Oje má’, pecché mm’hê miso ‘ncopp”o munno
quanno hê tenuto ‘o core ‘e mme lassá?”
No, ninno mio, mammá prega ‘a Madonna
ca nun ‘a castigasse ‘ncuollo a te…
Tu staje luntano, ma io te canto ‘a “nonna”,
comme si t’addurmisse ‘mbracci’a me!
Pentita ‘e che? Pentita
………………………………
