Te lasso

‘O ssaccio!…Nun ‘o ddí!…T’aggio capito:
                mo ca te so’ marito
                te cride ‘e cumanná!…
                E vuó’ ca, primm”e tutto, â casa ‘e mámmema
                nun aggia cchiù accustá…
                Ma i’ comme mm’aggi”a spartere?
                Mammá mme vò’ vedé…
                E tu, pe’ farla chiagnere,
                mme vuó’ sempe cu te!
 
                No!
                Cu tutto ca te voglio tantu bene,
                cu tutto ca te sento dint”e vvéne…
                te lasso!… Sí!…pecché:
                si nun rispiétte a mámmema,
                tu nun vuó’ bene a me!…
 
                                                                II
 
                Siénteme buono: Nun dá retta â gente…
                ‘o munno è malamente
                ognuno vò’ vedé…
                E chi vène a parlarte male ‘e mámmema
                nun parla bene ‘e te…
                ma no, tu nun ll’hê ‘a credere
                si no mme faje danná…
                Io só’ cuntento: accídeme
                ma lássame a mammá!…
 
                No!
                Cu tutto ca te voglio tantu bene,
                cu tutto ca te sento dint”e vvéne…
                te lasso…Sí!…pecché:
                dint’a stu core, mámmema,
                sta scritta primm”e te…

 
 
                                                               III
 
                Nce ll’aggio ditto a mamma: “Ve sbagliate,
                ma chi ve ll’ha cuntate
                tutte sti ‘nfamitá?!
                Chi porta ‘o nomme mio, nun è pe’ dicere,
                è degna d”o purtá…”
                Mammá s’è misa a chiagnere…
                Pe’ fá cuntento a me
                te vò’ vedé pe’ dicere
                ca cerca scusa a te…
 
                No!
                Ca quanno ‘a vecchia mia mme benedice
                si stóngo ‘ncroce pure so’ felice!
                Si tu vuó’ bene a me,
                va’ cerca scusa a mámmema…
                e i’ cerco scusa a te!