Presentimento

Si tu mme vide chiagnere
                quanno stó’ ‘mbracci’a te,
                si tu te siente stregnere
                cchiù forte ê vvote, nun ‘o ssaje pecché?
                Saccio ca t’aggi”a perdere:
                sento ca t’alluntane,
                ca tu te ne puó’ ghí primma ‘e dimane
                pe’ nun turná cchiù a me…
 
                E tanno mme faje chiagnere:
                tanno mm’attacco a te cchiù forte ‘e ll’èllera…
                Ll’èllera? E, comm’a ll’èllera,
                vurría murí
                cu te: accussí…
 
                                         II
                E i’ dico: “E’ ben inutile
                si è destinato giá:
                core ca s’hann”a spártere
                nisciuna cosa ‘e ppò cchiù avviciná…”
                Cchiù ‘e bbraccia te ‘ncatenano,
                cchiù ‘o core dice: Addio!
                Ah, comm’è scuro stu destino mio
                pe’ ‘sta fatalitá!…
 
                E nun te saccio dicere
                pecché mm’attacco a te cchiù forte ‘e ll’èllera…
                Ll’èllera? Ah, fosse ll’èllera!
                Putría murí
                cu te: accussí!
 
                                         III
                Dimme…E si ‘e ffronne tornano
                ca uttombre fa cadé;
                si tutto torna a nascere,
                qua’ primmavera ce pò stá pe’ me?…
                Cchiù ‘o core è stracquo ‘e chiagnere,
                cchiù ‘nnammurato ‘o sento…
                Si mo ce sparte stu presentimento,
                pecché mm’attacco a te?
 
                E’ ammore? E’ ammore! E abbracciame,
                comm’io t’abbraccio, e sóngo peggio ‘e ll’èllera!
                Ll’èllera! I’ sóngo ll’èllera!
                Voglio murí,
                cu te: accussí!