‘O tammurraro

Se struje ‘a pelle e ‘o dito se cunzuma,
sunanno d’ ‘a matina a ‘nfino a’ sera.
Te siente ‘e di’: Staje sempe ‘e na manera:
se vede ca nun tiene a che penza’.
Ma jate a farve friere,
si chesta è ll’’arta mia!
Sunanno, ‘mmiez’a’ via,
traspare ll’allegria:
ma, quanno è ‘Avummaria,
nun accocchio pe’ magna’.
Che allerezza! Sta cosa s’è fatta assai seria.
‘E ttammorre nn’ ‘e vvonno, pecché c’è ‘a miseria.
E muglierema a’ casa se spassa ‘a jurnata
cu sette guagliune e ‘a cucina stutata.
Si po’ se ‘mbruscina, lle dico: Va’ llà!
Sto tanto sunato, che vuo’ chiù suna’?
Apprima for’ ‘e vasce li gguaglione
facevano parla’ li ttammurrelle.
Che stroppole e che belli canzuncelle
llà ‘ncoppa te sapevano accucchia’.
E ‘e ggente ca passavano
restavano ‘ncantate
‘e sti tammurriate
‘e nenne scapricciate;
ca, po’, cu na ballata
quase sempe jeva a ferni’.
Mo ‘a guagliona nn’abballa, nun sona, nun canta:
se sciupa p’ ‘o vizzio, va ascianno a ll’amante;
s’alliscia, se pitta, t’avvista e se lanza,
po’, doppo, ‘o tammurro t’ ‘o forma cu ‘a panza.
E quanno è attesato se torna ‘ammuscia’:
s’abboffa e se smoscia p’ ‘o troppo suna’.
E m’aggio fatto ‘e ddiece d’ ‘e sunate.
n’aggio scassato pelle ‘e tammurrelle!
Ma tanno me pugnevano ‘e ggranelle:
‘ncasavo e ascevo sulo ‘int’a ll’esta’.
Ma mo aggi’ ‘a asci’ cu ‘o chiovere:
se ‘nfonna la pellecchia;
se spogna e s’arrepecchia;
se forma na guallecchia:
comme a na panza ‘e vecchia
ca n’è bbona cchiù a suna’.
Si cagno arte e che faccio? po’ rideno ‘e gente?
Vint’anne ‘e carriera mm’ ‘e sciupo ‘int’a nniente?
Si ‘a zuppa nun ghiesce ca ‘o popolo è pirchio,
m’agguazzo cu ‘a pelle, m’arrangio cu ‘o chirchio.
Cu sette guagliune che vvuo’ cchiù suna’?
Sunanno, ‘a famiglia cchiù larga se fa!