I’ m’arricordo ‘e Napule

I’ mm’arricordo ‘e Napule ‘e matina,
Quanno schiarava juorno a ppoco a ppoco,
‘Nu ventariello doce e ‘n’aria fina,
Spuntava ‘o sole ‘ncielo comm’ ô ffoco.

‘A tutt’ ‘e ffronne canteva auciello
E salutava a tutt’ ‘e nnenne bbelle
E ‘a ‘nu guaglione ‘mmanech’ ‘e cammisa
Senteva chesta voce ‘e paraviso:

“Rrose, rrose de maggio,
Rrose pe’ ‘nnammurate,
Cu ‘st’aria ‘mbarzamata
Vuje dint’ ô lietto state?”

I’ mm’arricordo ‘e Napule ‘e cuntrore,
‘O sole ca cuceva ‘e sentimente,
‘Na coppia ‘e ‘nnammurate a ‘na cert’ora
Se deva a Margellina appuntamento.

E lu Vesuvio visto da luntano,
‘O mare ca sbatteva chiano chiano,
Mentre de’ scoglie respirav’ addore,
Senteva ‘n’ata voce ‘e cantatore:

“I’ tengo ‘a ‘nnammurata ch’è bella
E stò geloso,
E tengo ‘e persiane
Apposta pe’ dischiude”.

I’ mm’arricordo ‘e Napule ‘e nuttata,
‘Ncopp’a ll’onne Pusilleco addurmeva
E po’ menava ‘n’aria profumata,
Comm’a ll’argiento ‘a luna le spanneva.

E quanno ‘e chillo cielo i’ mm’arricordo,
Me vene a ll’uocchie ‘e llagreme ‘nu velo,
Pare ca veco ‘e stelle ‘na curona
E sento ancora ll’eco ‘e ‘sta canzona:

“Oje, varca lenta e stracqua,
I’ penzo ‘a nenna mia,
C’ ‘a voglio bbene ancora,
E moro ‘e gelusia”.