‘E buscie

Ma pecché, ma pecché nun mme guarde?
                Ch’è succieso?…’o pputimmo sapé?
                Só’ venuto nu poco cchiù tarde!?…
                E va buó’ mo te spiego ‘o ppecché:
                Sono stato un momento add”o sarto…
                Só’ busciardo?…Busciardo e maligno?
                e io dimane ‘o vestito mm”o ‘ncigno
                accussí tu mme cride, Concé’…

                         Nun mme chiammmá busciardo, bella mia,
                         pecché mme piglio collera e nun sta…
                         E overo, io dico spisso na buscía,
                         ma ê vvote, dico pure ‘a veritá!…

                                                             II

                Mm’hanno visto passá ‘ncarruzzella
                cu na donna vestita marrò’?
                Biundulella?…Truccata?…Un po’ snella?…
                Sissignore…e chi dice ca no?
                Ma, Concé’, se non senti ‘a ragione,
                tu non devi tremmá ‘e gelusia…
                quella lí, non la sai? è zizía…
                na sorella cugina ‘e mammá…

                         Nun mme chiammá busciardo, bella mia,
                         ………………………………………………………….

                                                            III

                 E mo dimme: quel tale studente
                 ca te vene ogne tanto a truvá…
                 quello lí che cos’è, t’è parente?
                 ho capito: è nipote a papá!…
                 E chist’ato ch’affaccia ‘e rimpetto
                 e ti guarda e ti fa l’occhiolino?
                 Pure chisto, Concè’ t’è cugino?
                 ho capito: è nipote a mammá!…

                          Nun mme chiammá busciardo, bella mia,
                          pecché tu manche addure ‘e santitá…
                          E’ overo, io dico spisso na buscía…
                          ma tu nun dice maje na veritá…